يوم الخميس الفات كان اخر امتحان ليا تخيل بقي اخر يوم امتحان
قايم رايق لبست واتشيكت وحلقت << اصل بنخرج نلف اول اللجنه متخلص بقي
نزلت دورت سيارتي وتوجهت للكليه وانا في السكه سواق تاكسي خبط سيارة فورد اسكورت نزل صاحب السياره وشكلة كان باين انه مش عربي وبس كان بيعرف يتكلم عربي مكسر ونزل سواق التاكسي علشان يتفاهمو او يتعاركو المهم سواق التاكسي: مش تخلي بالك يا يا بيه
الاجنبي: انت الجلطان انت مش تشوف كويس
انا لقيت الوضع هيحتدم وانا عاوز اخلص اوصل للكليه امتحن واخرج بقي
فقلت انزل اسلك واهدي الاتنين بس سواق التاكسي معجبهوش ان واحد اجنبي يغلطه فقاله: انا المش بشوف يا اعمي القلب والنظر
الاجنبي: انت وجد
كلنا سكتنا وجد......يعني ايه سواق التاكسي سالني يعني ايه الكلمه دي قلتله تقريبا قصد يقوللك وغد لقيت سواق التاكسي وشه احمر وزعق
انا وغد انا وغد بيقولي يا وغد
قلتله يا عم عادي مفهاش مشكلة دي مش شتيمه قوي يعني<< بحاول اهديه
سواق التاكسي: يا سلام
انا : ايوه طيب بص انا احنا كلنا اوغاد وبصيت لواحد كان واقف ميت من الضحك وقلتله مش انت وغد قالي ايوه انا وغد علشان مشيت من شارع ابوقير دلوقت كنت مشيت من علي البحر كنت وصلت بسرعه
قلت لسواق التاكسي شوفت اهو الراجل طلع وغد والناس الواقفه دي كلها اوغاد وانا كمان وغد
الراجل الاجنبي طلع لقيم قوي قالي :نو...نو....انت مش وجد هوا بس وجد
سواق التاكسي : تاني بيقولي يا وغد
الاجنبي حب يولعها بقي: مش بس وجد وكمان هقير
انا بصراحة اتخنقت من الاجنبي قلتله: ياعم اقعد بقي ترجم الفيلم بتاعك ده علي جنب والنبي
وبعد مباحثات ومشادة اقنعت سواق التاكسي ان وغد دي كلمة يعني يا باشا
او حضرتك واقنعت الراجل الاجنبي ان يكبر عقله علشان نخلص
وراح الاجنبي لعربيته وركبها وهوا ماشي قال لسواق التاكسي: اي هاف يور نمبرز يور انشورنس شود باي فور زيس(مفكر نفسه في بلده والتامين هيصلحله العربيه)
وجري بعربيته سواق التاكسي : بيقولي ام شورنس بيشتم بالام
والله منا سايبه
قلتله يا عم لا لا لا انا بيدلعوني ويقولولي ام شورنس هوا بيقولي شكرا يا ام شورنس
وربنا يسامحني علي الكدب الكدبته علي سواق التاكسي بقي
الإهداءات
06-18-2007, 09:51
عركة اجنبي مع سواق تاكسي 
العرض العادي
